USolwazi WeKhemistri Ungomunye Wabaholi Abasha Besikhungo Sasezweni

Click here for English version

USolwazi osalolongwa, u-Thishana Singh, waseSikoleni SezoLimo neSayensi ungomunye wabaseqoqweni labaholi abasha be-South African Chemical Institute (SACI), lapho ezophatha khona isikhundla seminyaka emithathu eYiphini LoMhleli Omkhulu we-South African Journal of Chemistry (SAJC).

USingh uzosebenza noSolwazi Tricia Naicker waseSikoleni SeSayensi YezeMpilo, onguMhleli Omkhulu.

Esikhundleni sakhe esisha, uSingh uzogxila ekubhekeni amaqhinga aleli bhuku locwaningo, izinga lezindlela zalo zokubheka izindlela zokuthi abacwaningi babuyekeze umsebenzi wabanye, ukweseka ababhali nababuyekezi, ukubona izindawo ezintsha zocwaningo nokuqinisa igama le-SAJC ezweni naphesheya.

USingh wafika e-UKZN ngonyaka wezi-2018 ewumfundisi omkhulu eSikoleni seKhemistri neFiziksi ngaleso sikhathi, ngemva kokusebenza embonini nakwezokwelapha ngonyaka wezi-2024.

Ucwaningo lwakhe lugxile kwi-computational nutraceutics, ngokusebenzisa izindlela enezibalo yokubheka ukwakheka kwemithi emisha yezifo ezinjengesifo sikashukela nesofuba.

USolwazi Singh, ongumcwaningi onezinga C2 le-National Research Foundation (NRF), useshicilele amaphepha ocwaningo abuyekezwe ngabanye abacwaningi angama-63 futhi wahlabana ngemiklomelo eminingi yocwaningo kusukela ngowezi-2022, okubalwa kuyona ukuxhaswa yi-Royal Society of Chemistry (RSC), i-NRF ne-DAAD (German Academic Exchange Service).

Wenza izifundo zocwaningo zeminyaka emibili eStockholm University e-Sweden, obheka ukushintsha kwamakhemikhali ezinsimbi.

Ucwaningo lwakhe lusebenzisa imishini yokufunda ekwenzeni imithi futhi useke wabambisana nabacwaningi base-Afrika, eYurophu nase-Asia. Useke waphosa esivivaneni emikhankasweni yase-UKZN ye-Women in Science.

USolwazi Singh unamava emsebenzini we-SACI, njengoba akewabasesiGungwini soMkhandlu futhi wabamba iqhaza egatsheni laKwaZulu-Natali. Ngaphambi kwalokho, wayengusihlalo we-Inorganic Division ye-SACI kanti uneqhaza ezimpikweni zayo ze-Molecular Modelling nolwe-Physical Chemistry.

Kweminye imisebenzi yakhe kubalwa owe-RSC Researcher Grants Peer Review Group nekomiti lokuhlela izingqungquthela nekomiti le-NRF eligxile ekuhloleni izinto zeKhemistri.

Ngemuva kokusebenza iminyaka eminingi kwi-SAJC, ngemva kokuqala eyi-Computational Chemistry Sub-Editor, uSolwazi Singh uthe “yinto enkulu futhi uthakasile” ngalokhu kuqokwa.

“Lokhu kuqokwa kwenza ngikwazi ukuphosa esivivaneni sebhuku locwaningo elibeneqhaza elibalulekile ekuqhakambiseni ucwaningo lwekhemistri eNingizimu Afrika iminyaka engaphezu kweyikhulu. Ngithatha lesi sikhundla hhayi nje njengempumelelo yami kodwa ngisithatha njengomsebenzi wokuqhubeka nokukhulisa ibhuku locwaningo, ukukhulisa igama lalo emhlabeni, ukudala amathuba abacwaningi ukuthi bakhombise ucwaningo lwabo lwesayensi olusezingeni eliphezulu,” kusho yena.

Wonke, woyisishiyagalombili la malungu amasha e-SACI ngabantu besifazane, uSolwazi Singh athi “kuqinisa idolo kakhulu”, wathi abantu besifazane basebancane emikhakheni eminingi yesayensi, ikakhulukazi ekubeni ngabaholi.

Uthe ulindele ukuthi ukuqokwa kwakhe kumkhulise ekubeningumholi wezemfundo ngaphezu kokufundisa nokucwaninga, kumvule amahlo ngocwaningo lwesayensi nocwaningo olusha ngekhemistri yonke. Ufisa ukwandisa ukubambisana nabanye abacwaningi baphesheya futhi abambe iqhaza mathupha ekusimamiseni isayensi yamakhemikhali eNingizimu Afrika nase-Afrika.

Amagama: wu-Christine Cuénod

Isithombe: Sithunyelwe

Latest

I-Reclaiming UQOBO Ibheke Ukuxhumana Phakathi Kobugugu Nempilo

Isifundo Sokuqala Besigxile Kwezempilo Ezinobuqotho

Related

Umfundi Wezobudokotela Uhlabene Emncintiswaneni Wocwaningo LweFiziyoloji

Iqembu le-Goalball Lase-UKZN Libuye neSiliva Emqhudelwaneni wase-Clermont