Click here for English version
Kuqopheke umlando ngesikhathi amaqembu abesilisa nelabesifazane e-goalball aseNyuvesi yaKwaZulu-Natali (UKZN) engena emqhudelwaneni wokuqala ezweni ngaphandle kwaKwaZulu-Natali.
Lo mqhudelwano obuseNyuvesi yase-North-West (NWU) nobuhlelwe yi-Goalball Federation South Africa (GFSA), ubunamaqembu ayisikhombisa asezweni lonke, okubeyingqophamlando emizamweni ye-UKZN yokuvusa nokuthuthukisa imidlalo yabafundi abanokukhubazeka.
Amaqembu abekhona bekuyi-UKZN, i-NWU, iTshwane University of Technology (TUT), iTshwane North Technical and Vocational Education and Training (TVET) College (TNC), i-South West Gauteng College (SWGC), iNyuvesi yaseLimpopo ne-Optima College.
Iqembu labantu besifazane lase-UKZN belibhekene nezimbangi ezinzima emidlalweni yalo yokuqala, lakhala ngaphansi ngo 6-2 yi-Optima College no 8-3 yiTNC. Nokho likhombise ukuvuka emaqandeni labhincisela nxanye izimbangi zalo i-TUT egcine inqobe ngo 7-5. Lo mdlalo walo ukhombise ukuzithemba kwalo, ukuxhumana kangcono nokubambisana kangcono kuleli thimba elisafundana.
Iqembu labantu besilisa liyiqale kahle inqina lihlula i-SWGC ngo 6-2 ngaphambi kokuwina ngengcacamezela ka 4-3 emdlalweni walo ne-Optima College. Lidliwe yi-SWGC ngo 5-3 emdlalweni onzima, lathola amava amqoka okudlala ezingeni lezwe.
Nakuba lingekho iqembu lase-UKZN elifinyelele esigabeni sezindondo kodwa lo mqhudelwano wenze abadlali bakwazi ukubona amaqhinga ehlukene okuhlasela, ukuvimba, ukulinda nokulandela ibhola. Lomqhudelwano uveze nezindawo iqembu okufanele liphucule izinto kuzona njengoba amaqembu eqhubeka nokuthuthukisa amakhono awo nokulungiselela imincintiswano ezayo.
Umqeqeshi wase-UKZN uMnu Phiwayinkosi Mungwe uchaze lo mqhudelwano njengobeyisifundo esikhulu kubadlali nethimba labaqeqeshi.
“Kubewusizo kakhulu ukubona ukudlondlobala kwabadlali be-goalball base-UKZN. Sibone ikhono labadlali bethu, sabona nezindawo ezidinga ukulungiswa. Imiqhudelwano yezwe ayifani nokuziqeqesha kanti manje abadlali sebeyaqonda okulindeleke kuleli zinga,” kusho uMungwe.
Wengeze ngokuthi iqembu lizosebenzisa ulwazi elilitholile ukuphucula indlela yokuziqeqesha, ukuthuthukisa abadlali nokulungiselela kangcono imiqhudelwano ezayo.
Isekela lomqeqeshi uMnu Derrick Munyai libalule ubumqoka bokuqhudelana namaqembu anamava, wathi abadlali sebenolwazi lwezinga elilindeleke kubona ezingeni lezwe. Iqembu lizogxila ekuphuculeni amaqhinga okudlala, ukuvimba, ukuphosa nezinqumo elizenzayo.
Imenenja yeqembu uDkt Khumbuzile Khumalo uthe lo mqhudelwano ubuyingqophamlando kwi-goalball yase-UKZN, watusa isibindi, ukuzimisela nokuzinikela kwabadlali.
“Siyaziqhenya kakhulu ngabadlali bethu. Yonke imidlalo ibiyithuba lokufunda kanti lolu lwazi luzosisiza ukuthi sibumbe amaqembu anamandla kusasa,” kusho yena.
UDkt Khumalo ugqugquzele abafundi besifazane ukuthi badlale ngokuzethemba, wabanxusa ukuthi bangavumeli ukusaba kwabo kubanqinde ezifisweni zabo.
Ukuvuselelwa kwemidlalo yabantu abakhubazekile e-UKZN ngonyaka wezi-2026 kudale amathuba okuthi abafundi baphucule amakhono abo, bazethembe futhi bamele iNyuvesi emincintiswaneni . I-goalball ngeminye yemidlalo elekelela lokuzibophezela okusha ekutheni wonke umuntu abambe iqhaza.
UDkt Khumalo ubonge isikhulu sezemidlalo e-UKZN uNks Nosipho Tenza, iNhloko yeZemidlalo uMnu Zwelithethindaba Sapula neMenenja yoPhiko oLweseka Abakhubazekile uMnu Amith Ramballie ngokubaxhasa nethimba labaqeqeshi ngokuzinikela kwalo
Womabili amaqembu abuye enokuzethemba kangcono, ukuqonda kangcono imiqhudelwano ezingeni lezwe nokuzinikela ukwenza kangcono.
Ukudlala kwala maqembu kokuqala kusho ikusasa elithembisayo lokwenza ukuthi i-goalball ithuthuke e-UKZN nokwandisa amathuba kubafundi abanokukhubazeka ukuthi babambe iqhaza futhi baphumulele kwezemidlalo.
Amagama: wuNombuso Dlamini
Isithombe: Sithunyelwe