I-UKZN Ivakashelwe Yinxusa LezeSayensi NezoBuchwepheshe LaseNtaliyane Ukuqinisa Ubambiswano Locwaningo

Click here for English version

IKolishi leSayensi yeZeMpilo laseNyuvesi yaKwaZulu-Natali (UKZN) ne-Centre for the AIDS Programme of Research in South Africa (CAPRISA) bebevakashelwe yiNxusa leZeSayensi neZobuChwepheshe eHhovisi leNxusa ePitoli uSolwazi Luca Tiano.

Inhloso yalolu hambo wukuqinisa ubudlelwano bokubambisana emkhakheni wesayensi nokukhombisa izinga eliphezulu locwaningo olwenziwa KwaZulu-Natali.

Umcimbi uqale e-Nelson R. Mandela School of Medicine, lapho u-Tiano ehlangane nePhini likaSekela Shansela neNhloko yeKolishi leSayensi yeZeMpilo uSolwazi Busisiwe Ncama, iNhloko neDini yeSikole sezoBudokotela uSolwazi Refiloe Masekela, iDini yoCwaningo eKolishi leSayenzi yeZeMpilo uSolwazi Bongani Nkambule noSolwazi Daya Moodley, ophethe uphiko i-Clinical Trials Unit.

USolwazi Ncama uthe kulo mhlangano injongo ye-UKZN wukuba yinyuvesi yaseNingizimu Afrika yangempela ngokuvulela kwimfundo, ukwenza izinto ezintsha ocwaningweni, ukuxhumana nomphakathi nokumela zonke izinhlaka zomphakathi, ukulungisa umonakalo womlando wezwe nokungalingani okwadala wumlando wezwe.

Uthe iKolishi leSayensi yeZeMpilo liyikolishi elihambisana nesikhathi, elinakekelayo, eliqotho nelizwa umphakathi nelakhelwe kwizibopho zokwelapha wonke umuntu nemfundo esezingeni eliphezulu.

USolwazi Ncama ubale izindikimba eziyisithupha zeKolishi. Nazi:

•    Impilo yokuKhula neyeNgqondo, ngenhloso yokugxila ekusebenzeni kahle kwayo yonke imizwa kusukela umuntu ezalwa, kuye ekugugeni.

•    Indlela yokuphila neNdawo yokuhlala, ngenhloso yokugxila ezifweni ezingathathelani ukuze umuntu abewumqemane futhi aphile isikhathi eside.

•    Ukulimala, Ukuphuthuma noKwelashwa, ngenhloso yokwandisa ukuhlenga abantu, ukunakekela abalimele, abahlinziwe nabalulamayo.

•    Izifo ezithelelanayo, ngenhloso yokwandisa ukuqonda ngesandulela-ngculazi nesifo sofuba ukuphucula izinga lempilo yabantu abantekenteke empilweni

•    Izindlela zokunakekela iziguli (neZokwelapha), ngenhloso yokushintsha inqubo, ukuyibumba nokuyiqinisa.

•    Imfundo yeSayensi YezeMpilo, ngenhloso yokwandisa izinga eliphezulu ekufundiseni nasekufundiseni nasekusebenziseni izindlela zokwenza izinto ezisezingeni eliphezulu kwisayensi yezempilo kwimfundo nokuqeqesha.

Izingxoxo bezigxile kumathuba okwakha ubudlelwano bamazwe kwisayensi yezempilo, izindlela ezintsha zokucwaninga, ukuhambelana kwezemfundo nokuthuthukisa amakhono phakathi kweNingizimu Afrika neNtaliyane.

Ngokohlelo losuku, uTiano uvakashele e-CAPRISA eThekwini Research Clinic, lapho emukelwe khona yiNhloko yoCwaningo Lemishanguzo uDkt Nivashnee Naicker noDkt Sharana Mahomed, iNhloko ye-HIV Pathogenesis. Lolu hambo luqhakambise umsebenzi oyingqalabutho we-CAPRISA wokuvimba isandulela-ngculazi, ucwaningo lwemishanguzo, isayensi yokuthelelana neqhaza eliqhubekayo lalesi sikhungo lokubhekana nezinselelo zezempilo emphakathini.

Leli thimba livakashele iKomkhulu le-CAPRISA i-Nelson R Mandela School of Medicine yase-UKZN, lapho u-Tiano ehlangane noMqondisi we-CAPRISA uSolwazi Salim Abdool Karim babanesidlo ngaphambi kokuthi akhonjiswe amagumbi kaNokusho alesi sikhungo, esigabe ngengqalasizinda esezingeni eliphezulu yokwenza ucwaningo oluhlonishwayo emhlabeni jikelele lokulwa nezifo ezithathelanayo nezifo ezintsha zezempilo.

Lolu hambo lufakazele ukuzibophezela kwe-UKZN, i-CAPRISA neNdlu yeNxusa laseNtaliyane ekuthuthukiseni isayensi ngokubambisana phakathi kwamazwe nokuqinisa igama leKwaZulu-Natali lokubayindawo evelele yocwaningo lwezempilo.

Amagama nesithombe: wuLunga Memela

Latest

I-Reclaiming UQOBO Ibheke Ukuxhumana Phakathi Kobugugu Nempilo

Isifundo Sokuqala Besigxile Kwezempilo Ezinobuqotho

Related

Umfundi Wezobudokotela Uhlabene Emncintiswaneni Wocwaningo LweFiziyoloji

Iqembu le-Goalball Lase-UKZN Libuye neSiliva Emqhudelwaneni wase-Clermont