Click here for English version

UDkt Andrisha Beharry-Ramraj waseSikoleni seZomnotho ne-Bhakti Yoga Society (i-BYS) yaseNyuvesi yaKwaZulu-Natal (UKZN), bebenze umcimbi obizwa ngokuthi ‘Investing in Invisible Wealth’, okusho ukutshala emnothweni ongabonakali, obuhlanganise abafundi, abasebenzi basenyuvesi namanye amalungu omphakathi wasenyuvesi ngentambama yokuzodingida nokuninga ngezinto.

Lo mcimbi usanda kwenzelwa e-Graduate School of Business and Leadership e-UKZN kwikhempasi yase-Westville. Isikhulumi saphesheya Ingcwele uSB Keshaya Swami ukhulume ngokuhlakanipha, uzwelo, ukuthula, ubuqotho, injongo nobudlelwano obunenjongo, wathi yizinto ezingabonakali ngamehlo nezingakaleki.

U-Keshava Swami unguthisha wezenkolo, umbhali nomfundisi owangena empilweni yobundela eneminyaka engama-21 ngemva kokuthweswa iziqu e-University College London. Usefunde ukujula kwemibhalo yokuhlakanipha kwe-Sanskrit ngaphezu kweminyaka emihlanu, wabhala izincwadi ezingaphezu kweshumi, wahlela izifundo ezingaphezu kwama-50. Umsebenzi wakhe ubheka injongo, ubudlelwano, izinselelo zabantu nempilo. 

Phakathi kwangeminyaka yowezi-2025 nowezi-2026 waphothula impilo yokubawumcwaningi wobundela ngokugcwele e-Harvard Divinity School, egxile kwinkolo yobu-Vedi. Uvame ukukhuluma emanyuvesi, ezinkampanini, ezikhungweni zohulumeni nabantu abangamakholwa.

Ukufika kwakhe kunike abafundi ithuba lokubheka ukuxhumana phakathi kwemfundo, ezomoya nokuzithuthukisa komuntu. Lolu hlelo lukhuthaze abafundi ukuthi baninge ngokuthi izinto ezinjengozwelo, ubuqotho nenjongo zingabubumba kanjani ubudlelwano babo, imisebenzi yabo neqhaza labo emphakathini.

U-Keshava Swami ugcizelele ukubaluleka kokuthuthukisa umuntu ngaphezu kwemfundo. Uthe: “Imfundo yangempela ayisho ukuthola ulwazi kuphela kodwa nokuthuthisa izinto ezisenza sibengabantu abangcono nabaneqhaza ekuthuthukiseni umphakathi.”

Ukwengeza ekuhlukeni kohlelo, izimfundiso zika-Keshava Swami zikhonjiswe eshashalazini yi-Bhakti Theatre. Imidlalo yeshashalazi ibihambisana nezimfundiso zakhe, yayindlela yokuthi abafundi nezivakashi bathole ithuba lokuninga ngezinto obekukhulunywa ngazo. Inhlanganisela yokukhuluma, ukuxoxa izindaba nemidlalo yeshashalazi yenze uhlelo lwaqondeka kalula, kwaluphaphamisa futhi lwahambisana nezethameli ezehlukene.

I-BYS inamalungu angabafundi kumakhempasi ase-UKZN i-Howard College ne-Westville. Ibanika ithuba lokubheka ulwazi lwezomoya, izimiso nokuzithuthukisa komuntu ngezinkulumo nezinye izinto.

‘I-Investing in Invisible Wealth’ ikhuthaza abafundi ukuthi babheke ukuthi bangazithuthukisa kanjani nokuthi babenjengo okuhambisana nezitifiketi zemfundo yabo. Lolu hlelo lukhuthaze abafundi ukuthi baninge ngokuthi ulwazi, isimilo nezimiso abaphila ngazo kungabanamuphi umphumela kwizinqumo zabo, ubudlelwano babo nemisebenzi yabo yakusasa.

Amagama: wu-Andrisha Beharry-Ramraj

Izithombe: wu-Shravan Bhana